巴黎(法語:Paris)係法國嗰首都,位到喺塞納河岸舷上,係法蘭西大島嗰中心。巴黎市區有到2005年估計 2,153,600人 。巴黎大都會區人口有993萬 ,哈有條兜巴黎一圈嗰通勤帶,攏共115萬人 ,係歐洲人口最多嗰地區之一 。
巴黎位到河、路嗰交叉點嗰地勢讓佢到十世紀嗰就係法國主要城市之一嘍,有好多皇宮,有錢嗰修道院,哈有間大教堂;到十二世紀巴黎己經係歐洲學術同到藝術嗰主要中心之一。而今,巴黎到政治、時裝、商業、藝術同到科學都好有影響力。佢係洲際運輸嗰重要樞杻之一,哈有好多大學、體育盛事、歌劇公司同到世界知名嗰博物館 ,每年遊客超吥3000萬 。
巴黎地區係法國經濟活動最前端嗰中心。佢到2005年本地生產總值有4787億歐元,佔到同年法國嗰國民生產總值嗰四分之一。佢嗰拉德芳斯區係歐洲最大嗰商業中心,過半嗰法國主要公司同到全世界最大嗰100間公司嗰十間嗰總部都放到箇首 。巴黎哈係好多國際機構嗰總部,像聯合國教科文組織、經濟合作及發展組織、國際總商會等。巴黎拕評為係世界四大國際都會之一 。